UKA 2001/23
A L L A N N G U U T I S S A T U T S I U N N E R S U U T
uunga
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaattut siunnersuut
Aappassaaneerinninnermut Naalakkersuisunit saqqummiunneqartoq.
§ 1
1. § 1, imm. 2 ima oqaasertaqassaaq:
"Imm. 2. Nakkutilliinerup annertussusia ingerlanneqarneralu pillugit aalajangersakkanik erseqqinnerusunik Naalakkersuisut aalajangersaassapput."2. § 5 ima oqaasertaqassaaq:
"Kommunalbestyrelsinut ilaasortanik, qinikkatut isumaginninnermut tunngasunik suliaqartussanik, Naalakkersuisut pikkorissartitsisassapput, kingusinnerpaamik kommunalbestyrelsinut qinersinerit tamaasa kingorna ukioq ataaseq qaangiutsinnagu."
Nassuiaatit
Nr. 1-imut
Aalajangersakkap allanngortinneqarneratigut Naalakkersuisut pinngitsooratik nakkutilliinermut malittarisassanik erseqqinnerusunik aalajangersaasussanngorput. Malittarisassat taakku nalunaarummi 2002-mi januaarip aallaqqaataani peqqussutip atortuulerneranut atatillugu akuersissutigineqartussami aalajangersarneqassapput.
Allannguutissatut siunnersuut imaaliallaannaq allaffissornikkut aningaasatigulluunniit kinguneqassanngilaq, piffissarli ungasinnerusoq isigalugu nakkutilliinermut atatillugu angalanernut il.il. aningaasartuuteqartarnerulernissaaq naatsorsuutigineqarsinnaavoq.
Nr. 2-mut
Aalajangersakkap allanngortinneqarneratigut Naalakkersuisut pinngitsooratik kommunalbestyrelsinut qinersinerit tamaasa kingorna kommunalbestyrelsinut ilaasortanik isumaginninnermut tunngasunik suliaqartussanik pikkorissartitsisalissapput. Aalajangersakkap oqaasertalerneqarneratigut isiginiarneqarpoq kommunit ilaanni isumaginninnermut ataatsimiititaliaqannginnera, taamaattumillu kommunini taakkunani isumaginninnermut ataatsimiititaliami ilaasortat taakkuusinnaanatik peqataasussat.
Kommunalbestyrelsinut qinersinerit tamaasa kingorna ukioq ataaseq qaangiutsinnagu taama pikkorissartitsisoqartarnissaanik siunnersuuteqarnikkut ilaasortanik pineqartunik apriilimi 2001-imi kommunalbestyrelsinut qinerneqartunik 2002-p qaammataasa siulliit pingasut ingerlanerini pikkorissartitsisoqassaaq.
Pikkorissartitsisarnissamik siunnersuut oqarasuaatikkut KANUKOKA-mut saqqummiunneqarsimavoq. Tassanngaanniit iluarisimaarneqarpoq Namminersornerullutik Oqartussat inatsisiliornerit isumaginninnermut tunngasut pillugit pikkorissartitsisarniarmata.
Siunnersuut ukiut sisamanngorneri tamaasa Nunatta Karsianut aningaasatigut kinguneqartassaaq, siullermik 2002-mi. Pikkorissartitsisarnissanut aningaasartuutaasartussatut missingerneqartut 1,5 mio. kr.-iupput. Taama missingiinikkut naatsorsuutigineqarpoq, suliffeqarnermut ataatsimiititaliani ilaasortanik il.il. pikkorissartitsisarnerit assigalugit, atuisut akiliuteqartarnerisigut aningaasalersueqataasoqassasoq. Atuisut akiliutaat ullumikkut ullumut pikkorissarfiusumut ataatsimut peqataasumut ataatsimut 750,- kr.-iuvoq.